الوطن سبورت | وائل القباني: الزمالك محتاج فرقة كاملة.. الإدارة أخطأت في أزمة بيزيرا (حوار)

أشاد وائل القباني، لاعب نادي الزمالك الأسبق بمستوى الفريق حاليا مع مدربه معتمد جمال وتحقيق نتائج إيجابية في الدوري المصري رغم كل الأزمات التي تواجه القلعة البيضاء.

قال وائل القباني في تصريحات خاصة لـ«الوطن سبورت»: «الزمالك ليس محظوظًا، ده توفيق ربنا وتعب الفريق، ومعتمد جمال الراجل ده شغال من نار مع الزمالك بكل صراحة، وربنا يعينه على الفترة اللي جاية».

وائل القباني: ركلة جزاء الزمالك صحيحة 100%

وأضاف: «ركلة جزاء الزمالك أمام غزل المحلة واضحة بكل تأكيد، ومفيش فيها أي شك بنسبة 1%، واللي بيشكك فيها عايز يعمل تريندات على السوشيال ميديا وخلاص، الله يهديهم».

وتابع نجم الزمالك السابق: «الناس اللي بتقول إن الزمالك محظوظ، طب ما يروحوا يشوفوا الأهلي بيكسب إزاي وبعدين يتكلموا».

وعن أزمة خوان بيزيرا، أوضح القباني: «أنا شايف إن مجلس الإدارة تعامل مع ملف بيزيرا بشكل خاطئ، يعني إيه لاعب يتمرد عليا وأنا أطلع بيانات أقول إن اللاعب مش للبيع، وفي الآخر أقول هبيعه وفقًا لشروطي؟».

وواصل: «بالشكل ده، أي لاعب هيعوز يمشي بعد كده ممكن يروح يقعد في بلده ويقول أنا عايز أمشي، وهتكون فيه سابقة حصلت، وهيبقى السؤال اشمعنى بيزيرا؟».

سعر خوان بيزيرا

تابع: «أنا شايف إن بيزيرا يتباع بأكتر من 5 ملايين دولار، ده أهم لاعب في صفوف الزمالك خلال الموسم اللي فات، ونزل ماتش سموحة جابلك الفوز وخرج تاني مصاب، إزاي يتباع لاعب زي بيزيرا برقم هزيل بالشكل ده؟ لو الزمالك عايز يجيب لاعب بنفس إمكانياته دلوقتي، هيدفع فيه كام؟».

واختتم وائل القباني تصريحاته بالحديث عن احتياجات الزمالك: «لو اتفك القيد، الزمالك محتاج فرقة كاملة، مش لاعب ولا اتنين، الفريق محتاج حوالي 10 لاعيبة سوبر، مش نص نص، عشان يبقى عندك فريق قادر ينافس».