جمال علام يثير الجدل مجددًا:«أنا زملكاوي ومش هنكر»
تحدث جمال علام، رئيس اتحاد الكرة السابق، عن انتمائه الكروي وحقيقة “تطفيش” كيروش من تدريب منتخب مصر خلال فترة توليه الجبلاية.
وقال جمال علام في تصريحات تليفزيونية: “أنا مش هأنكر إني زمالكاوي، بس أنا بحب كل اللاعبين المصريين، في اتحاد الكرة بننسى ميولنا، وانتمائي للزمالك ماثرشي على شغلي”.
وعن موضوع تطفيش كيروش، قال علام: “بعد أمم إفريقيا، كيروش اتصل بيا وقال إنه عايز يمشي فورًا. كان وقت السحور في رمضان، رحت له وسألته: ليه عايز تمشي؟
فقال لي: ‘عندي ظروف شخصية ووالدي مريض وفقلت له: ‘إحنا عايزين نجدد العقد’. قال لي: ‘هشوف ظروفي وأستشير والدي'”.
وتابع: “من أول يوم كان بيقولوا إن اتحاد الكرة مش عايز كيروش، وإن الاتحاد هو اللي سرب العقد، أنا مش عارف مين اللي قال كده. عامر حسين وخالد الدرندلي وإيهاب الكومي كلموا معاه، وبعدها قال لي: ‘هرد عليك يوم الإثنين’.
فقلت له: ‘إحنا في اجتماع، قول لنا يوم الأحد، في الاجتماع اللي كان عبر ‘زوم’، كيروش هو اللي بلغنا بقراره إنه هيمشي، إحنا مش اللي ‘طفشناه’ زي ما تردد”.
وبخصوص الغرامة المالية اللي كانت عليه من “كاف”، قال علام: “المشكلة كانت في الغرامة المالية اللي كانت عليه من الاتحاد الإفريقي، كانت 50 ألف دولار قدمنا تظلم فخفضت لـ25 ألف دولار، وكان عايزنا ندفعها، فدفعنا الغرامة بعد ما خدنا الموافقات اللازمة”.
